وروستی
د چاپېریال ساتنې ملي ادارې عمومي رئیس د ولسي جرګې د چاپېریال ساتنې کمېسیون په غونډه کې ګډون وکړ
د چاپېریال ساتنې ملي ادارې عمومي رئیس، شاه زمان میوندي، د دې ادارې مسلکي معین انجنیر عزت الله صدیقي او د اړوندو ادارو استازو د مرغومي په ۲۴مه نېټه د ولسي جرګې د چاپېریال ساتنې او طبیعي سرچینو کمېسیون په غونډه کې ګډون وکړ.
ښاغلي میوندي د هوا ککړتیا د مخنیوي په تړاو د دې ادارې د وروستیو اقداماتو په اړه د ولسي جرګې استازو ته معلومات ورکړل او ویې ویل: دغه اقدامات به د لنډ مهاله او اوږدمهاله پلان له مخې ترسره شي؛ ترڅو د کابل ښار د هوا حالات په بنسټیزه توګه بدلون ومومي. ده وویل: د لومړي ځل لپاره موږ د هوا ککړتیا راکمولو او مخنیوي لپاره پنځه کلن جامع پلان جوړ کړی چې د اړوندو ادارو د ګډې همکارۍ په ترڅ کې به لا قوي او بډایه شي.
ورپسې د چاپېریال ساتنې ملي ادارې مسلکي معین، انجنیر عزت الله صدیقي د هوا ککړتیا د راکمولو او مخنیوي په تړاو د دې ادارې د وروستیو اقداماتو د جزیاتو په اړه د ولسي جرګې استازو ته هر اړخیز معلومات ورکړل چې د وکیلانو له تود هرکلي سره مخ شول.
د ولسي جرګې د چاپېریال ساتنې او طبیعي سرچینو کمېسیون رئیس، حاجي خان محمد وردګ د چاپېریال ساتنې ملي ادارې کړنې وستایلې او ویې ویل: د ولسي جرګې غړي له هوا ککړتیا سره د مبارزې په برخه کې هر راز همکارۍ ته چمتو دي او که په دې برخه کې ادارې هر ډول وړاندیزونه لري د ولسي جرګې د ملاتړ ترلاسه کولو په موخه دي له موږ سره شریک کړي.