وروستی
د پلازمېنې د هوا ککړوونکو سرچينو د نظارت او تفتيش په داوم
د سلواغې لومړۍ نېټه – کابل
د جدي اقداماتو په دوام د چاپېریال ساتنې ملي ادارې، کابل ښاروالۍ او د کورنيو چارو وزارت د نظارت او تفتيش ګډ ټيم د کابل ښار له مختلفو اصنافو څخه ليدنه وکړه او د هوا ککړوونکي سرچينې يې وارزولې.
د دې ارزونې او تفتيش په ترڅ کې د ۱۸ مختلفو تصديو مرکز ګرميو څخه چې په درېيمې، نهمې، لسمې، يوولسمې او پنځلسمې ناحيو کې يې موقعيت درلود نظارت وشو، چې په پايله کې د (۵) تصديو له مالکينو څخه د سونګ سيستمونو د اصلاح ژمنه واخيستل شوه، (۱۱) تصديو خپل سونګ سيستمونه اصلاح کړي و او يوې فابريکې او يو حمام چې د دود د تصفيې فلترونه يې نه و نصب کړي وتړل شول.
د يادونې وړ ده چې د دې ارزونو او نظارت لړۍ به په پوره جديت سره د کابل ښار په ټولو سيمو کې همداسې دوام لري او د چاپېريال ساتنې ملي اداره له ټولو هغو تصديو څخه چې تر دې دمه يې د خپلو سونګ سيستمونو په اړه جدي اقدامات نه دي کړي، هيله کوي چې د چاپېريالي مفتشينو له رسېدو څخه مخکې خپل سونګ سيستمونه اصلاح کړي او د دود فلترونه دې نصب کړي او کنه د سرغړونې په صورت کې به يې فعاليتونه ودرول شي.