وروستی
د اقليم زرغون صندوق په اړه دوه ورځنی تخنيکي ورکشاپ ترسره شو
د ليندۍ ۲مه – کابل
د چاپېريال ساتنې ملي ادارې د ملګرو ملتونو د خوړو او کرنې سازمان (FAO) په تخنيکي همکارۍ او د اقليم زرغون صندوق (GCF) په مالي ملاتړ د روان کال د ليندۍ په لومړۍ نېټه د چاپېريال ساتنې ملي ادارې مسلکي معين انجينر عزت الله صديقي په شتون او د غزني، سرپل، پروان، کاپيسا، ننګرهار، لغمان، پنجشير، دايکندي، لوګر، نورستان، ميدان وردک او پکتيا ولايتونو د چاپېريال ساتنې، کرنې، اوبو لګولو او مالدارۍ، د ښځو چارو، د کليو د بيارغونې او پراختیا او د اوبو او انرژۍ رياستونو د رئيسانو په ګډون دوه ورځنی تخنیکي ورکشاپ ترسره کړ.
د دې ادارې مسلکي معين د ورکشاپ د پرانېستلو پر مهال د ملګرو ملتونو د اقليمي بدلون کنوانسيون او د اقليم زرغون صندوق د رامنځته کېدو په اړه ولايتي رئيسانو ته معلومات ورکړل او ويې ويل: په اقليم زرغون صندوق کې د نړۍ پرمختللي هېوادونه دې ته ژمن دي چې د دغه صندوق له لارې وروسته پاتې هېوادونو سره د اقليمي بدلون د اغیزو راکمولو او سازښت په موخه مالي سرچينې د ځانګړو شرايطو له مخې برابري کړي.
ښاغلي صديقي وويل، چې د دې مالي سرچينو د ترلاسه کولو لپاره د دولتي ادارو، مدني ټولنو او د پوهنتون استادانو همکارۍ او د دوی ترمنځ همغږۍ او د سيمې خلکو د نظرياتو اخيستو ته اړتيا ده، ترڅو وشو کولی د دقیقو برنامو په جوړولو سره د اقليم زرغون صندوق د مالي سرچينو له لارې پروژې په خپل هېواد کې پلي کړو.
د چاپېريال ساتنې ملي ادارې مسلکي معين د دې برنامې له ټولو ګډونوالو وغوښتل، چې د دغه ورکشاپ څخه ترلاسه شوي معلومات دې خپلو اړوندو ولايتونو مسوولينو او د ولايت له خلکو سره شريک کړي.