وروستی
د چاپېريال ساتنې ملي ادارې رهبرۍ په کابل کې د څلورو اروپايي هېوادونو له سفيرانو وليدل
د چاپېريال ساتنې ملي ادارې عمومي رئيس شاه زمان ميوندي په داسې حال کې چې د دې ادارې د پاليسۍ او نړيوالو اړيکو معين ادريس مليار او مسلکي معين انجينر عزت الله صديقي هم ګډون درلود، تېره پنجشنبه وروسته له غرمې د ليندۍ مياشتې په درېيمه نېټه په کابل کې د دنمارک، ناروې، سويدن او فنلند هېوادونو له سفيرانو سره وکتل.
په دې ناسته کې دواړو اړخونو د هېواد د چاپېريال ساتنې او طبيعي ميراثونو اړوند، ګډو همکاريو باندې خبرې وکړې او نظريات يې سره تبادله کړل.
د چاپېريال ساتنې ملي ادارې عمومي رئيس شاه زمان ميوندي د اقليمي بدلون مسئلې په شمول د چاپېريال اهميت ته په پاملرنې سره د داخلي او نړيوالو بنسټونو ترمنځ يې د همکاريو او همغږيو وده مهمه وګڼله او د افغانستان د چاپېريال ساتنې په په برخه کې يې د دې هېوادونو ملاتړ او حسن نيت څخه مننه وکړه.
د يادو هېوادونو سفيرانو د چاپېريال ساتنې ملي ادارې سره د همکاريو د اعلان ترڅنګ يې د همغږيو پر ودې او د نړيوالو مرستو د دوام د اړتيا په برخه کې ټينګار وکړ.
د يادونې وړ ده چې د دې ليدنې په ترڅ کې د کابل ښار د هوا د ککړتيا په هکله هم خبرې اترې وشوې او دواړو اړخونو د دې ستونزې پر وړاندې د مبارزې په تړاو خپلې تجربې سره شريې کړې.