وروستی
د اقليم زرغون صندوق لپاره د پيشنهادي طرحو په انکشاف کې د جندر مسايلو د ادغام سازۍ په موخه مشورتي ورکشاپ ترسره شو
د چاپېريال ساتنې ملي ادارې د اقليم زرغون صندوق لپاره د پيشنهادي طرحو په انکشاف کې د جندر مسايلو د ادغام سازۍ تر عنوان لاندې د روان کال د ليندۍ مياشتې په ۶مه نېټه د چاپېريال ساتنې ملي ادارې د اوزون ملي دفتر مسوول او د اقليم بدلون سرپرست رئيس احمد صميم هوشمند په رياست او د دې ادارې د جندر آمرې، د جندر آمرينو او وزارتونو او خپلواکو ادارو ته د ځواب ورکوونکي بوديجې جوړونې کارپوهانو په ګډون ښوونيز او مشورتي ورکشاپ د بند امير د غونډو په تالار کې ترسره شو.
ښاغلي هوشمند د اقليم بدلون مالي ميکانيزمونو او په ځانګړي ډول د اقليم زرغون صندوق لپاره يې د پيشنهادي طرحو په انکشاف کې د جندر مسايلو د ادغام سازي ارزښتناکه وبلله او ويې ويل: په وروسته پاتې او په جګړه کې بوختونو هېوادونو کې مېرمنې ترټولو زيان منونکی قشر دی او د يوې پروژې په ټولو انکشافي پړاوونو کې بايد ورسره مشوره وشي، نوموړي همدارنګه وويل چې اقليم زرغون صندوق هېڅ هغه پروژه نه تائيدوي، چې په هغې کې د جندر موضوعات په پام کې نه وي نيول شوي او د چاپېريال ساتنې ملي اداره دې برخې ته جدي پاملرنه لري.
همدارنګه په دې ورکشاپ کې د چاپېريال ساتنې ملي ادارې د جندر آمرې آغلې نادرې رشيدي، جندر ته د ځواب ورکوونکې بوديجې جوړونې مسوولې آغلې فرحناز يار، د اقليم زرغون صندوق پروژې د جندر مسوولې آغلې مارينا فايز او اقليم زرغون صندوق لپاره د چمتووالي وجې پروژې مسوول محمد مصطفی صاحبزاده د خپلو پرزنټېشنونو په وړاندې کولو سره د اقليم بدلون او اقليم زرغون صندوق کې د جندر موضوعاتو مدغم کولو، په دې برخه کې د کړنو او لاسته راوړنو په هکله معلومات وړاندې کړل.
د دې مشورتي برنامې په دوام کې ګډونوال څلورو ګروپونو ( کرنه او طبيعي سرچېنې، انرژي او اوبه، ترانسپورت او معارف ) باندې ووېشل شول او خپل نظريات او وړانديزونه يې شريک کړل.
دا نظريې د چاپېريال ساتنې ملي ادارې لخوا په پروژو او د اقليمي بدلون برنامو کې د جندر مسايلو د ادغام سازۍ په لارښود او همدارنګه اقليم زرغون صندوق ته د افغانستان په ملي برنامه کې ځای پرځای کېږي.
خبریال: عبدالولي عابد
عکاس: سید امید سادات