وروستی
د کابینې د قوانینو په کمېټه کې د هوا ککړتیا راکمولو او مخنیوي مقررې په تعدیلاتو بحث وشو
د سلواغې ۶مه – کابل
د افغانستان اسلامي جمهوریت دویم مرستیال استاد سرور دانش په مشرۍ د کابینې د قوانینو کمېټې د سلواغې په ۶مه نېټه غونډه وکړه چې پکې د چاپېریال ساتنې ملي ادارې عمومي رئیس شاه زمان میوندي، د پالیسۍ او تقنین سرپرست رئیس هارون محمدزي، او حقوقي سلاکار نعمت الله سلطاني هم ګډون کړی وو.
د هوا ککړتیا راکمولو او مخنیوي مقررې د تعدیل طرحه له درې وړاندیز شویو طرحو څخه وه چې د کابینې د قوانینو کمېټې پرې بحث وکړ.
د عدلیې وزیر د هوا ککړتیا راکمولو او مخنیوي مقررې د تعدیل طرحه وړاندې کړه او ویې ویل: چې د یادې طرحې د تعدیل او بیا کتنې پر مهال د چاپېریال ساتنې ملي ادارې، عامې روغتیا وزارت او کابل ښاروالۍ استازو ګډون درلود، چې د ټولو د هوکړې پر اساس یاده طرحه چمتو شوې ده.
نوموړي زیاته کړه: چې د هوا ککړتیا راکمولو او مخنیوي مقرره کلونه وړاندې نافذه شوې ده؛ خو اوس د هواککړتیا کړکیچن حالت ته په کتو په ځانګړي ډول د ژمي په موسم کې د هواککړتیا خورا زیاتیږي او د کابل ښار په ګډون د لویو ښارونو اوسېدونکي ورسره لاس او ګرېوان وي؛ نو اړینه ده چې د هواککړتیا د مخنیوي په موخه په دغه طرحه کې ځینې تعدیلات رامنځته شي.
په دغه طرحه کې د درېمې مادې ۵ جز، د څلورمې، پنځمې، شپږمې، نهمې، یوولسمې، پنځلسمې، څلرویشتمې، څلوردېرشمې، شپږ دېرشمې، اووه دېرشمې، نهه دېرشمې او یوڅلوېښتمې مادو مواد چې په (۹۹۱) شمېره رسمي جریده کې په 20/5/1388نېټه خپره شوې وه، په تعدیل کې شامل دي.
د چاپېریال ساتنې ملي ادارې عمومي رئیس، شاه زمان میوندي په دې غونډه کې ټینګار وکړ چې د چاپېریال ساتنې او له ککړتیا سره مبارزې لپاره ملي اراده او د اړوندو ادارو ترمنځ ټینګه همکاري اړینه ده، ده وویل: د هواککړتیا د راکمولو او مخنیوي مقرره کې تعدیل سره به وکولای شو چې په لویو ښارونو کې د ککړتیا د راکمولو او مخنیوي چارې ګړندۍ کړو.
د یادولو وړ ده چې دغه طرحه له هر اړخیزه بحثونو او نظرونو وروسته تائید شوه. د هوا ککړتیا د راکمولو او مخنیوي مقرره په داسې حال د کابینې د قوانینو کمېټې له خوا د بحث وړ ګرځي چې د چاپېریال ساتنې ملي ادارې د هوا ککړتیا د راکمولو په موخه د بېړنو اقداماتو لپاره د کابینې له لوري پنځه کلن پلان تصویب کړی او په ټول هېواد په ځانګړې توګه د کابل ښار کې د هوا ککړتیا سرچینو او غیرمعیاري سونګ سیسټمونو باندې به پلی کیږي.