وروستی
د ډنډونو نړیوالې ورځې په هکله د چاپېریال ساتنې ملي ادارې اعلامیه
د سلواغې ۳مه - کابل
هر کال په ټوله نړۍ کې د فبروري په دویمه نېټه د ډنډونو نړیواله ورځ لمانځل کیږي. ډنډونه هغه ځایونه دي چې د اېکوسیټم په جوړښت کې رغنده رول لري او د نباتاتو، حیواناتو او الوتونکو ژوند ور سره تړلی دی.
دغه ورځ د لوموړي ځل لپاره په ۱۹۷۱ کال کې د فبروري په دویمه نېټه د ډنډونو نړیوالې ورځې په توګه ونومول شوه.
داسې اټکل کیږي چې د ټولې ځمکې ۶سلنه ډنډونه جوړوي.
سږکال هم د ډنډونو نړیواله ورځ د ژوند_بڼو او ډنډونو تر عنوان لاندې په ټوله نړۍ کې د ډنډونو او ژوند بڼو د اهمیت په هکله د خلکو د عامه پوهاوي کچې لوړوالي په موخه لمانځل کيږي.
افغانستان هم د ځینو ډنډونو لکه: کول حشمت خان، د ناور دښته، د غزني ولاړې اوبه، د پوزک هامونونه، او صابري سیمو په درلودلو سره چې د ایکوسیسټم مهم خدمتونه او د ژوند بڼو لپاره د ژوندانه ځای، ځایګی برابروي او همدا راز د جنیټیکي منابعو د ساتنې له کبله ځانګړی ارزښت لري؛ د باارزښته چاپېریالي هېوادونو په ډله کې راځي.
دغه ډنډونه د ځمکې د سر او ځمکې لاندې اوبو د تقویت زمینه برابروي او د اوبیزو، بومي او کډوالو مرغانو لپاره وړ پټنځایونه ګڼل کیږي؛ همدا راز د هېواد د ښکلې هوا په تصفیه کولو کې هم رغنده رول لوبوي او د ګرځندوی سکټور د تقویت لامل ګرځي.
د چاپېریال ساتنې ملي ادارې د ساتل شویو سیمو د ملي پلان په نظر کې نیولو سره په کول حشمت خان، ناور دښتې، د بند امیر ډنډونو، د پوزک هامونونو او صابري سیمو تخنیکي مطالعات ترسره کړي او د ښه مدیریت لپاره یې دا اداره ژمنه ده. له قدرمنو هېوادوالو هم هیله مند یو چې د دیادو او نورو مرطوبو او د ساتنې وړ سیمو چې له طبیعي ښکلا او ارزښت څخه برخمنې دي، په ساتنه او پالنه کې د چاپېریال ساتنې ملي ادارې سره پوره همکاري وکړي.
د فبروري ۲مه – کابل