وروستی
د هوا ککړتیا راکمولو په برخه کې د خصوصي سکتور د پانګونې په ملاتړ بحث ترسره شو
د سلواغې ۱۳مه – کابل
د چاپېریال ساتنې ملي ادارې مسلکي معین انجنیر عزت الله صدیقي د سوداګرۍ او صنایعو خونو په هغه غونډه کې ګډون وکړ چې د هوا ککړتیا راکمولو او مخنیوي په برخه کې د خصوصي سکټور د عامه_پوهاوي او ملاتړ په موخه د سلواغې په ۱۳مه نېټه جوړه شوې وه.
په دغه غونډه کې د سوداګرۍ او صنایعو خونې مشرتابه پلاوي، د کابل ښاروالۍ استازو او د خصوصي سکټور له ۵۰ تنو څخه زیاتو سوداګرو ګډون کړی وو.
د چاپېریال ساتنې ملي ادارې مسلکي معین د هواککړتیا مختلفو لاملونو په هکله ګډونوالو ته معلومات ورکړل او ویې ویل: د هوا د ککړتیا یو لامل د کمپنیو او شرکتونو وده ده چې خصوصي سکټور کولای شي د هواککړتیا راکمولو او مخنیوي په پار د باکیفیته سونګ توکو په چمتو کولو کې مثبت او ګټور رول ولوبوي.
ښاغلي صدیقي وویل: د چاپېریال ساتنې ملي اداره د باکیفیته سونګ توکو په چمتو کولو کې د هر ډول ګټورې او اغېزمنې حل لارې هرکلی کوي او په دې برخه کې هر اړخیزې همکارۍ ته چمتو ده.نوموړي زیاته کړه: د طبي پاتې شونو او ډبرو سکرو د تصفیه کولو په برخه کې پانګوال شتون لري او موږ چمتو یو چې په راتلونکي کې په دې برخه کې دې ته ورته ناستې ترسره کړي.
په یاده غونډه کې د سوداګرۍ او صنایعو خونې لومړي مرستیال محمد یونس مومند او یو شمېر پانګوالو هم خبرې وکړې، په هېواد او ځانګړې توګه کابل ښار کې یې د هوا ککړتیا د مخنیوي او راکمولو په برخه کې د چاپېریال ساتنې ملي ادارې پاملرنه د قدر وړ وبله او د دې ادارې کړنې یې وستایلې.
همدا رنګه په دې غونډه کې د چاپېریال ساتنې ملي ادارې د ارزونې او تلپاتې پراختیا رئیس انجنیر نقیب الله صدیقي د مطرح شویو موضوعاتو په تړاو معلوماتي پریزنټیشن وړاندې کړ او تر څنګ یې ګډونوالو هم خپل نظرونه شریک کړل.
د غونډې په پای کې سوداګرو ژمنه وکړه، چې د باکیفیته او تصفیه شویو ډبر سکرو او د لوګیو د فلترونو د چمتو کولو په برخه کې به د پام وړ پانګونه کوي او په دې تړاو به د اړوندو ادارو استازو سره راتلونکو غونډو کې هم ګډون کوي.