وروستی
د نوي لمریز کال د راسېدو په پار د چاپېریال ساتنې ملي ادارې مشرتابه پلاوي د مبارکۍ پیغام
قدرمنو هېوادوالو!
د ۱۳۹۹ لمریز کال د راسېدو له امله د هېواد قدرمن ولسمشر، مرستیالانو، د ولسي جرګې او مشرانو جرګې رئیسانو، وکیلانو او افغانستان درانه ملت ته د زړه له کومې مبارکي وایم.
د نوي کال د پسرلي په راتګ سره ځمکه د شنو بوټو په را زرغونېدو سمسوریږي، ونې، بوټي او ګلان غوړیږي، مرغان خپلو ځالو ته راستنېږي، چاپېریال او طبیعت ښکلی کیږي او هره خوا د پسرلي د معطرو وږمې خورې وي.
خدای تعالی دې وکړي چې په راتلونکي کال کې د جنګ ځپلي افغانستان څخه د کرغېړنې جګړې ټغر ټول او زموږ مظلوم افغانان دې د سولې، امنیت او خوښیو په نېکمرغۍ مال لامال شي.
روانې جګړې د ډېر ناخوالو او ویجاړیو سربېره زموږ #چاپېریال، #وحشيژوي او #طبیعيسرچینې سختې زیانمنې کړي دي او لا یې زیانمنوي؛ الله تعالي دې وکړي چې ۱۳۹۹ کال په هېواد کې د سرتاسري سولې، نېکمرغۍ او خوښیو ډک کال شي. د لوی خدای (ج) له درباره څخه هیله مند یو چې موږ ته د هېواد د ابادۍ او ښېرازۍ توفیق راکړي.
درنو هېوادوالو!
خوښ یو چې په ۱۳۹۸ کال کې د الله تعالی په فضل، د جلالتمآب ولسشمر او ستاسو قدرمنو هېوادوالو په ملاتړ په دې وتوانېدو؛ ترڅو د چاپېریال او طبیعي سرچینو د ساتنې په برخه کې کوټلي ګامونه پورته کړو، ستاسو له همکارۍ پرته بریاليتوب ناشونی و، موږ ستاسو د همکارۍ منندوی یو.
سږ کال په داسې حال کې موږ د پسرلي هرکلی کوو چې په ټول هېواد کې د نیالګیو کېنولو ملي کمپاین ترسره او لا یې لړۍ روانه ده، اجازه راکړئ چې د افغانستان اسلامي جمهوریت په استازیتوب د دولتي چارواکو او قدرمنو هېوادوالو څخه مننه وکړم چې د نیالګیو کېنولو ملي کمپاین کې یې له موږ سره برخه واخیسته.
همدا راز له خپلو معین صاحبانو، رئیسانو او د چاپېریال ساتنې ملي ادارې له ټولو مرکزي او ولایتي کارکوونکو څخه د زړه له تله مننه کوم چې په پوره صداقت سره په ۱۳۹۸ کال کې خپلې دندې په ښه توګه ترسره کړې.
۱۳۹۹ کال د چاپېریال ساتنې په پار د (دولت او ملت د ګډو هڅو) کال نوموو او له خدای تعالی توفیق غواړو چې هېواد ته مو د خدمت جوګه وګرځوي.
درنښت
شاه زمان میوندي
د چاپېریال ساتنې ملي ادارې عمومي رئیس
وری-۱۳۹۹ کال-کابل