وروستی
د چاپېریال ساتنې ملي ادارې عمومي رئیس د ناروې کمېټې له رئیس سره وکتل
۱۴۴۶کال د رجب ۱۹مه نېټه/ کابل
د چاپېریال ساتنې ملي ادارې عمومي
رئیس مولوي مطیع الحق خالص نن یکشنبه د ۱۴۰۳کال د مرغومي په ۳۰مه نېټه
په افغانستان کې د ناروې کمېټې له عمومي رئیس ښاغلي تاریا مګنوسون واټردال په مشرۍ
پلاوي سره په خپل کاري دفتر کې وکتل.
په دې لیدنه کې چې د دې ادارې تخنیکي
ټیم هم حضور درلود، په راتلونکي کال کې د نیالګیو ویشلو او کېنولو پروسې د څرنګوالي؛
اقلیمي بدلون او همدا راز د ځمکې لاندې اوبو د مدیریت په تړاو نېږدې راتلونکي کې د
یوه کنفرانس جوړولو په هکله هر اړخیز بحث او خبرې وشوې.
د چاپېریال ساتنې ملي ادارې عمومي
رئیس مولوي مطیع الحق خالص د مېلمنو هرکلی وکړ او په افغانستان کې یې د ناروې کمېټې
د کارونو ستاینه وکړه. نوموړي وویل: اوبه، هوا او خاوره د انسان په ژوند کې مهم او
حیاتي رول لري او په دې برخه کې چې هر څوک کوچنی اقدام هم کوي د چاپېریال ساتنې
ملي اداره ورسره همکاره ده.
ښاغلي خالص: وویل موږ په دې هڅه کې
یو چې چاپېریالي مسایل له سیاست څخه لېرې کړو، زه تل له سفیرانو او نړۍوالو استازو
سره په خپلو لیدنو کې هڅه کوم چې په ژوند پورې تړلي موضوعات له سیاست څخه لېرې او
نړۍوال پر دې قانع کړو چې دا بشري مسایل دي او له سیاست سره هیڅ اړیکه نه لري.
په افغانستان کې د ناروې کمېټې رئیس
د همکارۍ ژمنه وکړه او ویې ویل چې موږ به هم کوښښ وکړو چې چاپېریالي موضوعات سیاسي
نه شي.
د غونډې له لړ کې د دې ادارې د اقلیمي
بدلون او نظارت او تفتیش رئیسانو خپل نظرونه او وړاندیزونه وړاندې کړل او د ګډې
همکارۍ غوښتنه یې وکړه.