وروستی
د هېواد د چاپېریالي وضعیت ارزونې راپور د چمتو کولو په تړاو د حکومت د لوړپوړو مسؤلینو سره بحث ترسره شو
١٤٤٧کال د محرم الحرام ٢٠مه/ کابل
د چاپېریال ساتنې ملي ادارې له لوري د رها موسسې په همکارۍ
د افغانستان د بېلابېلو حکومتي ادارو لوړپوړو مسؤلینو په ګډون د هېواد د چاپېریالي
وضعیت ارزونې راپور د چمتو کولو په تړاو نن د ١٤٠٤ لمريز کال د چنګاښ میاشتې په ٢٥
نېټه د کابل په کانټیننتال هوټل کې بحث ترسره شو، تر څو د هېواد د چاپېریالي وضعیت
راپور د چمتو کولو په اړه مشورې او نظریات واخیستل شي او لازمه همغږۍ ترسره شي.
یاد بحث چې مشري یې د چاپېریال ساتنې ملي ادارې عمومي رئیس
مولوي مطیعالحق خالص کوله، په پیل کې یې د یاد راپور د ارزښت په اړه خبرې وکړې او
د هېواد د چاپېریالي وضعیت، اقلیمي بدلون منفي تاثیراتو، د څلورو لسیزو جګړو مخربو
پایلو او نورو جدي چاپېریالي ستونزو په اړه بحث وکړ؛ نوموړي وویل: زموږ طبیعت له
کلونو راهیسې د جګړو، اقلیمي بدلون، وچکالیو، غیرمترقبه ښاري پراختیا او ناقانونه
استوګنو له امله سخت زیانمن شوی دی. د چاپېریالي راپور چمتو کول یو اساسي ګام دی،
تر څو موږ د حالاتو کره انځور وړاندې کړو، د پالیسیو لپاره دقیق بنسټونه کښیږدو او
نړیوال ملاتړ جذب کړو.
ښاغلي خالص زیاته کړه ادارې یې په دې وروستیو کې د چاپېریال
ساتنې په برخه کې مهمو ملي او نړیوالو پرمختګونو ته زمینه برابره کړې ده.
ده وویل موږ وتوانېدو چې د چاپېریال او اقلیمي بدلون اړوند
نړيوالو کنفرانسونو او غونډو کې فعال حضور ولرو، تعلیق شوې پروژې بېرته پیل کړو،
نوې پروژې جلب کړو او د اقلیمي بدلون او چاپېریال مالي صندوقونو ته لاسرسی تأمین
کړو چې دغه هڅې به د چاپېریال د مدیریت، احیا، پالنې او خلکو ته د خدماتو پراخولو
لپاره بنسټیز بدلون راولي.
ورپسې د رها موسسې مرستیال انجنیر عزتالله صدیقي د چاپېریالي
راپور د جوړښت، محتواء، نړیوالو معیارونو او اړینو تخنیکي اجزاوو په اړه مفصل پرزنټېشن
وړاندې کړ. هغه زیاته کړه راپور به د کره معلوماتو، شفاف تحلیل، سیمهییزو ځانګړتیاوو
او واقعي وړاندیزونو پر بنسټ برابر شي.
د بحث په دوام د اقتصاد، صنعت او سوداګرۍ، کور او ښار جوړولو،
کډوالو او بېرته راستنېدونکو، اطلاعاتو او کلتور، کانونو او پطرولیم، اوبو او انرژۍ
او عامي روغتیا وزارتونو مرستیالانو او استازو ویناوې وکړې، دوی د خپلو ادارو نظریات
او وړاندیزونه شریک کړل او پر دې یې ټینګار وکړ چې راپور باید ملي، همهشموله او
له تخنیکي اړخه پیاوړی وي، څو د پالیسۍ جوړونې، نړیوالو همکاریو او د چاپېریال ښهوالي
لپاره عملي لاره هواره کړي.
د بحث په پای کې د چاپېریال ساتنې ملي ادارې عمومي رئیس
مولوي مطیعالحق خالص یو ځل بیا د ګډونوالو له همکاریو مننه وکړه او ویې ویل چې دا
بهیر به د شفافیت، همکارۍ او ملي ارادې پر بنسټ پرمخ وړل کېږي.
ذکر شوی بحث د دعایې په ویلو سره پای ته ورسېد او پرېکړه
وشوه چې د هېواد د چاپېریالي وضعیت راپور چمتو کول به د ټولو شریکانو په همغږۍ سره بشپړ شي.