حافظ عزیز الرحمن: روژه د رحمتونو او برکتونو میاشت ده، ورڅخه اعظمي ګټه پورته کړئ

۱۴۴۵کال د رمضان ۴نېټه/ کابل
د چاپېریال ساتنې ملي ادارې د دعوت او ارشاد رياست له لوري د اصلاحي ويناوو په لړ کې نن پنج شنبه د کب په ۲۴مه نېټه د دې ادارې د کول حشمت خان غونډو په تالار کې اصلاحي وینا وړاندې شوه چې پکې د دې ادارې ټولو کارکوونکو او مسوولینو ګډون کړی وو.

غونډه د قران عظیم الشان مبارکو آیتونو په تلاوت پیل شوه ورپسې د چاپېریال ساتنې ملي ادارې عمومي رئیس د روژې مبارکې میاشتې د فضایلو په هکله هر اړخیزه اصلاحي وینا وکړه او زیاته یې کړه: الله ج موږ تاسې ته یو عظیم فرصت او عظیم نعمت را په برخه کړ موږ ته په کار ده چې د دې ستر نعمت او فرصت چې د روژې مبارکه میاشت ده، اعظمي ګټه پورته کړو.

ښاغلي حافظ وویل: د روژې اصلي مقصد تقوا حاصلول دي، د الله تعالی د اوامرو پر ځای کول او د نواهیو، منکراتو او محرماتو څخه ځان ساتل دي؛ نو موږ ته په کار ده چې د اخروي ګټې لپاره تقوا حاصله کړو.

د روژې اصلي مقصد لوږه او تنده نه ده بلکې مسلمانان باید خپل ځانونه اصلاح  او په ځانونو کې مثبت تغیر راولي چې د روژې مبارکه میاشت د ځانونو د اصلاح لپاره یو ښه فرصت دی.

ده وویل: د روژې د اهدافو څخه دا هم دي چې مسلمانان یو د بل مرستې او نصرت ته ور ودانګي، رسول الله ص خپلو امتیانو ته امر کړی چې د روژې مبارکې میاشت کې زیات نیک اعمال ترسره کړي؛ ځکه په دې میاشت کې نفل د فرضو او فرض په اویا چنده فضیلت لري.