پر ګډوالۍ د اقلیمي بدلون اغېزو په هکله د ترسره شوو څېړنو په تړاو مشورتي ورکشاپ ترسره شو

۱۴۴۶کال د شعبان ۶مه نېټه/ کابل
د چاپېریال ساتنې ملي ادارې پالیسي او مسلکي معین په مشرۍ نن چهار‌شنبه د ۱۴۰۳کال د سلواغې په ۱۷مه نېټه، پر ګډوالۍ او داخلي بې ځایه شوو د اقلیمي بدلون اغېزو په هکله د ترسره شوو څېړنو په تړاو یو ورځنی مشورتي ورکشاپ ترسره شو چې پکې د دې ادارې او اړوندو امارتي ارګانونو مسوولینو او متخصصینو ګډون کړی وو.
غونډه د قرانکریم مبارکو ایتونو په تلاوت پیل شوه ورپسې د دې ادارې پالیسي او مسلکي معین د ګډونوالو هرکلی وکړ او د اقلیمي بدلون د ناوړه اغیزو په هکله یې خبرې وکړې؛ نوموړي وویل: اقلیمي بدلون یوه نړۍواله پدیده ده چې افغانستان یې هم له ناوړه اغېزو څخه ډیر زیات زیانمن شوی، په سویلي سیمو کې د اوبو د کمښت، وچکالۍ او تودوخې درجې لوړوالي له امله زموږ ډیری هېوادوال ګډوالۍ ته اړ شوي دي.

ښاغلي عابد له ګډونوالو وغوښتل چې د اقلیمي بدلون د ناوړه اغېزو پر ابعادو کار وکړي او پر ملي او نړۍوالو موسسو یې غږ وکړ چې د اقلیمي د ناوړه اغېزو راکمولو په برخه کې له اړوندو امارتي ادارو سره په ګډه لاس په کار شي.
د ورکشاپ په لړ کې د دې ادارې د اقلیمي بدلون رئیس روح الله امین هم خبرې وکړې او زیاته یې کړه چې د ټیلو موسسې په همکارۍ د افغانستان په ۶ولایتونو (کندهار، هلمند، فراه، نیمرزو، زابل او ارزګان) کې د اقلیمي بدلون ناوړه اغېزو په تړاو څېړنې شوې، ارقام او معلومات راټول شوي چې د امارتي ادارو د نظرونو او وړاندیزو راټولولو وروسته به یې پایلې له اړوندو ادارو او هېوادوالو سره شریکې شي.

ګډونوالو ته د TLOموسسې له‌خوا پر ګډوالۍ او داخلي بې ځایه شوو د اقلیمي بدلون اغېزو په هکله د ترسره شوو څېړنو د پایلو په تړاو هر اړخیز معلوماتي پرزنټېشن وړاندې شو.
په پای کې د ګډونوالو لخوا د موضوع په تړاو هر اړخیز بحث ترسره شو او ټینګار وشو چې د ذکر شوي موضوع پایلې دې د لاغنامندۍ په موخه له اړوندو ادارو سره شریکې کړي؛ ترڅو خپل نظرونه او وړاندیزونه له ادارې سره شریک او په دې پایلو کې ترې استفاده وشي.